ជីវិតប្រចាំថ្ងៃនៅវៀតណាម ពិតៗមានអ្វីខ្លះ? មកដល់ហើយទើបដឹងថាមិនដូចដែលគិត…

មកដល់ហើយ ទើបដឹងថាជីវិតមិនសាមញ្ញ… ប៉ុន្តែមិនពិបាកដូចដែលគិតទេ

អត្ថបទលេខ 5

បងប្អូនជាច្រើនគិតថា មកវៀតណាមគឺងាយ ខ្លះទៀតវិញគិតថាពិបាកណាស់ ប៉ុន្តែពេលមកដល់ពិតៗ បងប្អូននឹងយល់ថា វាមិនសាមញ្ញដូចដែលគិតទេ ប៉ុន្តែវាក៏មិនពិបាកដូចដែលគិតដែរ និយាយឲ្យត្រង់ បញ្ហាមិនមែននៅប្រទេសទេ ប៉ុន្តែស្ថិតនៅលើការយល់ដឹងរបស់យើងផ្ទាល់។

អាហារ និងការរស់នៅប្រចាំថ្ងៃ

នៅវៀតណាម មានរឿងមួយដែលបងប្អូនត្រូវដឹង ហាងអាហារ 2 កន្លែងនៅជិតគ្នាត្រឹម 10 ម៉ែត្រ តែតម្លៃអាចខុសគ្នាខ្លាំងណាស់ ប៉ុន្តែគុណភាពស្ទើរតែដូចគ្នា បើបងប្អូនមិនស្គាល់កន្លែង បងប្អូនអាចចំណាយលុយលើសដោយមិនចាំបាច់ ហើយនេះជារឿងដែលបងប្អូនជាច្រើនជួបនៅថ្ងៃដំបូង។
នៅទីក្រុងធំៗ ដូចជា ហូជីមិញ ជីវិតពេលយប់អាចបន្តដល់ម៉ោង 4–5 ព្រឹក មានកន្លែងញ៉ាំ និងកម្សាន្តច្រើន ហើយអ្វីដែលគួរឲ្យចាប់អារម្មណ៍គឺ មានអារម្មណ៍សុវត្ថិភាពជាងនៅកម្ពុជា ទោះបីជាយប់យ៉ាងណាក៏ដោយ។

ការធ្វើដំណើរ និងចំណាយ

នៅហូជីមិញ អាចនិយាយបានថាជាទីក្រុងមិនគេង 24 ម៉ោងក្នុងមួយថ្ងៃ បងប្អូនអាចហៅឡាន កុម្មង់អាហារ ឬធ្វើដំណើរបានគ្រប់ពេលវេលា ហើយនៅក្រៅតែងតែមានមនុស្សជានិច្ច។
ប៉ុន្តែមានចំណុចមួយដែលបងប្អូនត្រូវប្រយ័ត្ន គឺលុយវៀតណាមមើលទៅដូចថោកជាងលុយកម្ពុជា នេះធ្វើឲ្យបងប្អូនមានអារម្មណ៍ថា “អីៗក៏ថោក” ហើយចំណាយដោយមិនគិតច្រើន ប៉ុន្តែពេលចំណាយច្រើនៗ ទើបដឹងថាបានចំណាយលុយច្រើនហើយ មូលហេតុគឺមើលឃើញអ្វីៗថាថោកទាំងអស់។

បញ្ហាដែលបងប្អូនជួបញឹកញាប់

បញ្ហាធំបំផុតមិនមែននៅវៀតណាមទេ ប៉ុន្តែស្ថិតនៅលើការខ្វះព័ត៌មានពិត ភាគច្រើនបងប្អូនមើល TikTok ឬ Facebook ហើយគិតថាវាជារូបភាពទាំងមូលនៃវៀតណាម ប៉ុន្តែជាក់ស្តែង មនុស្សម្នាក់ៗមានបទពិសោធន៍ខុសគ្នា អ្នកមកម្តងនឹងនិយាយបែបមួយ អ្នករស់នៅយូរនឹងនិយាយបែបមួយទៀត។
ខ្ញុំសួរបងប្អូនមួយចំណុច បងប្អូនរស់នៅកម្ពុជា 20–30 ឆ្នាំ តើបងប្អូនយល់ដឹងអំពីប្រទេសខ្លួនឯងទាំងអស់ហើយទេ? ប្រហែលមិនទេ អញ្ចឹងមនុស្សម្នាក់មកវៀតណាមប៉ុន្មានដង ធ្វើ video មួយ តើអាចពន្យល់អ្វីៗបានទាំងអស់ទេ? ចម្លើយគឺមិនអាចទេ។
ឧទាហរណ៍សាមញ្ញ មនុស្សម្នាក់រស់នៅភ្នំពេញ 30 ឆ្នាំ ប៉ុន្តែមិនសូវចេញក្រៅ មិនអាចយល់ដូចមនុស្សរស់នៅ 10 ឆ្នាំ ប៉ុន្តែចេញក្រៅរាល់ថ្ងៃ ទោះស្តាប់ទៅចម្លែក ប៉ុន្តែវាជាការពិត ជីវិតពិត និងអ្វីដែលនៅលើអ៊ីនធឺណិត មិនដូចគ្នាទេ សូម្បីតែ AI ក៏មិនអាចដឹងលម្អិតដូចមនុស្សរស់នៅពិតៗបាន។

បើចង់រស់នៅងាយ កុំធ្វើតែឯង

បើបងប្អូនយល់ពីរូបភាពទាំងមូល បងប្អូននឹងរស់នៅបានងាយ ហើយបងប្អូនក៏អាចក្លាយជាអ្នកណែនាំឲ្យមិត្តភក្តិខ្លួនឯងនៅពេលក្រោយផងដែរ ខ្ញុំមិនបាននិយាយថាប្រទេសណាល្អជាងប្រទេសណាទេ ប៉ុន្តែខ្ញុំចង់និយាយពីអ្វីដែលខ្ញុំបានឃើញពិត នៅវៀតណាម ជីវិតពេលយប់មានអារម្មណ៍សុវត្ថិភាពជាង ប៉ុន្តែបើបងប្អូនមិនដឹងអ្វី បងប្អូនអាចបាត់បង់ពេល និងលុយបានយ៉ាងងាយ ដូច្នេះទៅណាក៏ដូចគ្នា ត្រូវមានផែនការ ហើយមានផែនការហើយ ត្រូវធ្វើតាមផែនការនោះ។

បន្តអានផ្នែកទី២ អំពីថ្ងៃដំបូងមកវៀតណាម និងអ្វីដែលត្រូវធ្វើ